Lennadennoù ar Sul
📅 D'ar Sul 26 a viz Gouere 2026
📜 Lennadenn gentañ
Lennadenn eus levr kentañ ar Rouaned (1Ro 3, 5. 7-12)
Goulennet ec'h eus evidout ar furnez.
En deizioù-se en em ziskouezas an Aotrou da Salomon dre huñvre-noz.
Hag e lavaras Doue : « Goulenn petra a roin dit. »
« Ha bremañ, Aotrou va Doue,
graet ec'h eus roue da servijer war-lerc'h David, va zad ;
met yaouank on, bihan, n’ouzon ket penaos en em ren.
Ha da servijer a zo e-kreiz ar Bobl, dibabet ganit, ur Bobl niverus, ken stank ma ne c’hell ket bezañ niveret na kontet gant ar bras ma-z eo.
Ro eta d’az servijer ur galon leun a skiant evit ma c’hello gouarn da bobl gant eeunded ha ma c’hello dishañvalout an droug diouzh ar mad, rak piv a c’hellfe barn biken da bobl hag a zo ken niverus ? »
Plijout a reas ar goulenn-se d’an Aotrou Doue, hag e lavaras da Salomon :
« Peogwir n’ac’h eus ket goulennet evidout nag ur vuhez hir, na pinvidigezh, na marv da enebourien ; met peogwir ac’h eus goulennet skiant evit gallout anavezout ar pezh a zo reizh, e roan dit da c’houlenn : reiñ a ran dit ur galon fur ha skiantek, evel n’en deus bet den ebet a-raozout, hag evel n’en devezo biken den ebet war da lerc’h. »
🎶 Salm
Salm 119 Salm 119 (118), 57 ha 72. 76-77. 127-128. 129-130
D : Nag e karan ho lezenn, Aotrou !
Va lod, Aotrou, en lavaret em eus,
a zo mirout ho komzoù.
Evidon eo priziusoc'h lezenn ho kenoù
eget aour hag arc'hant a-vernioù.
Met bremañ, en ho madelezh, va frealzit,
hervez ho promesa d'ho servijer.
Ra zeuio din ho trugarez da rentañ buhez din,
rak ho lezenn a zo va dudi.
Dreist pep tra e karan ho kourc'hemennoù,
muioc'h eget an aour, an aour glanañ.
Setu perak en em renan hervez hoc'h urzhiadurioù,
kasaat a ran holl hentoù ar gaou.
Souezhus-espar eo ho testenioù,
ha va ene neuze en em stag outo.
Diskleriadur ho komz a zo gwir sklêrijenn,
skiantegezh d'an tud izelek a galon.
📜 Eil lennadenn
Lennadenn eus lizher an Abostol sant Paol d'ar Romaned (ro 8, 28-30)
Hor rakverket en deus da vezañ heñvel ouzh patrom e Vab.
Va breudeur, gouzout a reomp emañ Doue o kenlabourat e pep tra evit o mad gant ar re a gar anezhañ, gant ar re en deus dibabet en e vennad.
Rak ar re en deus anavezet a-ziaraok eo ar re en deus rakverket da vezañ heñvel ouzh patrom e Vab, evit ma vo eñ ar mab-henañ da vreudeur e-leizh ;
Hag ar re en deus rakverket, o galvet en deus ; ar re en deus galvet, o lakaet en deus ivez da reizh ; hag ar re en deus lakaet da reizh, eo dezho ivez en deus roet ar c’hloar.
✝️ Aviel
Pennad eus an Aviel santel hervez sant Mazhev (Mz 13, 44-52 )
Laouen-holl ez a da werzhañ e holl beadra evit prenañ ar park-se.
Allelouia ! Allelouia ! (Mzh 11, 25)
Bennozh a lavaran dit, o Tad, Aotrou an Neñv hag an douar, dre m’ec'h eus kuzhet an traoù-se ouzh ar re fur ha desket, ha m’ec'h eus o diskuliet d’ar vugaligoù.
Allelouia !
En amzer-se e lavaras Jezuz d'an engroez :
« Heñvel eo Rouantelezh an Neñvoù ouzh un teñzor kuzhet en ur park. Sed un den ouzh e gavout, her c’huzhat a ra en-dro ; ha laouen-holl ez a da werzhañ e holl beadra evit prenañ ar park-se.
Pe c'hoazh :
Heñvel eo Rouantelezh an Neñvoù ouzh ur marc'hadour a glaske perlezennoù kaer.
Kavet gantañ ur berlezenn brizius-meurbet,
ez eo aet da werzhañ e holl beadra evit he frenañ.
Heñvel eo Rouantelezh an Neñvoù ouzh ur roued taolet er mor
a zastum pesked a bep seurt.
Ur wech leun, ar besketaerien o deus he zennet war an aod, hag aet en o c'hoazez,
o deus dibabet ar re vat en o faneroù, hag ar re fall o deus taolet kuit.
Evel-se e vo da zibenn ar bed : an Aelez a zeuio hag a zispartio ar re fall eus a-douez ar re vat, evit teurel anezho e forn an tan ; eno e vo ar gouelvan hag ar skrignadeg-dent.
« Ha komprenet hoc’h eus an holl draoù-se ? » -- « Ya », emezo.
Hag e lavaras dezho : « Setu perak kement Skrib a vo deuet da vezañ skoliet-mat diwar-benn Rouantelezh an Neñvoù a vo heñvel ouzh ur penn-tiegezh a denn eus e deñzor traoù nevez ha traoù kozh ».
Pennad eus an Aviel santel hervez sant Mazhev (Mz 13, 44-46 )
Laouen-holl ez a da werzhañ e holl beadra evit prenañ ar park-se.
Allelouia ! Allelouia ! (Mzh 11, 25)
Bennozh a lavaran dit, o Tad, Aotrou an Neñv hag an douar, dre m’ec'h eus kuzhet an traoù-se ouzh ar re fur ha desket, ha m’ec'h eus o diskuliet d’ar vugaligoù.
Allelouia !
En amzer-se e lavaras Jezuz d'an engroez :
« Heñvel eo Rouantelezh an Neñvoù ouzh un teñzor kuzhet en ur park. Sed un den ouzh e gavout, her c’huzhat a ra en-dro ; ha laouen-holl ez a da werzhañ e holl beadra evit prenañ ar park-se.
Pe c'hoazh :
Heñvel eo Rouantelezh an Neñvoù ouzh ur marc'hadour a glaske perlezennoù kaer.
Kavet gantañ ur berlezenn brizius-meurbet,
ez eo aet da werzhañ e holl beadra evit he frenañ.
🎙️ Selaou Aviel an deiz
📅 D'ar Sul 26 a viz Gouere 2026Pedenn an deiz gant Dominique ThépautHébergé par Audiomeans. Visitez audiomeans.fr/politique-de-confidentialite pour plus d\'informations.