Lectures du dimanche - 06/08/2029
📅 D'al Lun 6 a viz Eost 2029
Daou-ugent devezh a-raok Uhelidigezh ar Groaz, Treuzneuziadur an Aotrou a zegas da soñj penaos e vennas ar C'hrist "rakkemenn da galon e ziskibled tremen dreist da zroukskouer ar groaz", met bez' ez eo ivez kemenn an "advaberezh vurzhudus" a ra eus an holl grederien mibien da Zoue en e Vab Jezuz, ha kemenn ar sklaerded a splanno un deiz ganti korf an Iliz a bezh.
📜 1ère lecture
Lennadenn eus ar profed Daniel (Da 7, 9-10.13-14)
Kann ar blev war e benn evel gloan dinamm.
Derc’hel a raen da sellout : lakaet e voe tronioù, hag ur C’hozhiad a gemeras e blas. Gwenn e oa e zilhad evel an erc’h, ha blev e benn a oa evel gloan pur. E dron a oa anezhañ flammoù-tan gant rodoù tan o teviñ dindan.
Ur stêriad-tan a darzhe hag en em skuilhe a-zirazañ. Milmiliadoù hen servije, ha dek-milmiliadoù a oa en o sav dirazañ. Kroget e voe gant ar varnedigezh hag e voe digoret levrioù.
Sellout a ris er weledigezh-noz hag e welis o tont war goabr an Neñv evel ur Mab-Den ; dont a reas betek ar C’hozhiad hag e rejont dezhañ tostaat outañ.
Roet e voe dezhañ aotrouniezh, gloar ha rouantelezh hag an holl bobloù, broadoù ha yezhoù henn servijas. E vestroniezh a zo ur vestroniezh peurbadus ha na dremeno ket, hag e Rouantelezh ne vo ket distrujet.
🎶 Psaume
(Sa 97 (96), 1-2. 5-6. 9)
D : An Aotrou, an Uhel-meurbet a ren war an douar a-bezh.
An Aotrou a ren ! Ra drido an douar,
ra vo levenez gant bed an inizi.
Koumoul ha koabr a zo en-dro dezhañ,
reizhded ha gwir a zo diazez e dron.
Evel koar e teuz ar menezioù dirak Doue,
dirak mestr an douar a-bezh.
An neñvoù a skrij oc'h embann e reizhder,
an holl bobloù a wel splannder e c'hloar.
Rak C'hwi eo an Aotrou,
an Uhel-meurbet, an hini a ren
war an hollved,
a zo a-us d'an holl doueoù.
📜 2ème lecture
Lennadenn eus eil lizher sant Pêr (2Pe 1, 16-19)
Va breudeur ; n’eo ket o vont da heul marvailhoù savet ampart hor befe roet deoc’h da anavezout galloud Donedigezh hon Aotrou Jezuz Krist, met diwar welout e splannder gant hon daoulagad hon-unan.
Aze 'oamp pa resevas enor ha gloar digant Doue an Tad, pa zeuas warnañ, eus uhelder ar c’hloar, ar vouezh-se a lavare : Hemañ eo va Mab muiañ-karet, ennañ em eus lakaet va holl garantez.
Ar vouezh-se hon eus ni hon-unan he c’hlevet o tont eus an Neñv, p’edomp war un dro gantañ war ar menez santel.
Suroc’h a se e teu da vezañ evidomp lavar ar Brofeded, a rit mat o terc’hel dezhañ, evel ouzh ur c’houlaouenn o lugerniñ en ul lec’h teñval, betek ma paro an deiz ha ma savo ar Werelaouen en ho kalonoù.
✝️ Évangile
Pennad eus an Aviel santel hervez sant Mazhev (Mz 17, 1-9)
E zremm a lugernas evel an heol.
Allelouia ! Allelouia ! (Mzh 17, 5)
Eus kreiz ar goabrenn lugernus e tregern mouezh an Tad :
“ Hemañ eo va Mab muiañ karet : selaouit anezhañ ! ”
Allelouia !
En deizioù-se, Jezuz a gemeras gantañ Pêr, Jakez ha Yann e vreur
evit o c'has en distro war ur menez uhel.
Hag e voe treuzneuziet dirazo : e zremm a lugerne evel an heol,
hag e zilhad a zeuas da vezañ gwenn evel ar sklêrijenn.
Ha setu m’en em ziskouezas dezho Moizez hag Elias o komz gantañ.
Pêr o stagañ da gomz, a lavaras da Jezuz :
« Aotrou, brav eo deomp bezañ amañ ; mar karez e savimp amañ teir deltenn,
unan evidout, un all evit Moizez, hag un all evit Elias. »
Tra ma komze c'hoazh,
setu ur goabrenn lugernus a zeuas d’o goleiñ gant he skeud,
hag ur vouezh a voe klevet eus ar goabrenn o lavarout :
« Hemañ eo va Mab muiañ-karet am eus lakaet ennañ va levenez, selaouit anezhañ ! »
O klevout ar vouezh-se e kouezhas an diskibien war o genou d’an douar,
spontet bras.
Met Jezuz o tostaat a stokas outo en ur lavarout : « Savit, n’ho pet ket aon ! »
Neuze, o sevel o daoulagad,
ne weljont den ebet ken nemet Jezuz e-unan-penn.
Evel ma tiskennent diwar ar menez e roas Jezuz dezho ar gourc'hemenn-mañ :
« Na gomzit da zen eus ar pezh hoc'h eus gwelet,
ken na zihuno Mab an Den eus a-douez ar re varv. »
🎧 Aviel an deiz ar bloavezhioù tremenet
Pedenn an deiz gant Alan Ar Verj hag Annick Miossec, Jezuz Treuzfurmet
Maze 17, 1-9 - Gant Annick Miossec eo lennet an Aviel.
Mz 17, 1-9 - An Aviel lennet gant Annick Miossec.