Lectures du dimanche - 08/02/2026
📅 D'ar Sul 8 a viz C'hwevrer 2026
📜 1ère lecture
Lennadenn eus levr Izaias (Iz 58, 7-10)
Tarzhañ a ray da sklêrijenn evel ar beure.
Setu ar pezh a lavar an Aotrou :
Rannañ ar bara gant an hini naoniek,
Degemer en ti ar beorien dic'houdor !
Gwiskañ an neb a welez en noazh,
Chom hep treiñ kein d'ur breur !
Neuze e paro da sklêrijenn evel ur gouloù-deiz,
Ha da c'houli en em serro dizale.
Dirazout e kerzho da reizhder
Ha splannder an Aotrou az kwarezo en a-dreñv.
Neuze m’er galvez, an Aotrou a responto,
Ma hopez davetañ e lavaro : Setu-me !
Ma tistaolez diouzhit ar c'hoant-moustrañ,
Ar jestr a c'hourdrouz hag al lavaroù drouk,
Ma rannez da vara gant an den marnaoniek
Ha ma roez he gwalc'h da gorzailhenn ar reuzeudig,
Neuze da sklêrijenn a savo e-kreiz an teñvalderioù,
Ha da deñvalijenn a lugerno 'vel ur c'hreisteiz.
🎶 Psaume
(Sa 112 (111), 4-5. 6-7. 8a ha 9)
D : Splannañ a ra en deñvalijenn, sklêrijenn an dud eeun.
Evel ur gouloù e par en deñvalijenn evit ar re reizh,
gant e vadelezh, e drugarez hag e reizhder.
Eürus an den a vez digor e galon hag e yalc'h,
an hini a renk e aferioù gant onestiz.
Morse ne vezo distroadet.
Ar soñj anezhañ a bado da viken.
n'en deus ket aon gant keloù a walleur :
Divrall eo e galon o fiziout en Aotrou.
Dinec'h ha dispont eo e galon.
A-fonn e ro aluzon d'ar beorien,
e reizhded a bado da virviken,
e dal a splanno leun a c'hloar !
📜 2ème lecture
Lennadenn eus lizher kentañ an Abostol sant Paol d'ar Gorintiz (1Go 2, 1-5)
Kemennet em eus deoc'h mister ar C'hrist kroazstaget.
Evidon-me, breudeur, paz on deuet da brezeg en ho touez,
n’on ket deuet gant komzoù uhel pe furnez vras,
da zegemenn deoc'h testeni Doue.
N’em eus ket soñjet em boa un dra bennak
all da anavezout en ho touez nemet Jezuz-Krist,
hag eñ bet staget ouzh ar Groaz.
Ha me, dister, aonik, krenidik, paz on degouezhet du-se.
Va c'homzoù, va frezegennoù ne oant, tamm ebet,
komzoù strobinellus ar furnez,
met enno en em ziskoueze Spered ha nerzh Doue,
evit na vefe ket diazezet ho feiz war furnez an dud, met war c'halloud Doue.
✝️ Évangile
Pennad eus an Aviel santel hervez sant Mazhev (Mz 5, 13-16)
C'hwi eo sklêrijenn ar bed.
Allelouia ! Allelouia ! (Yn 8, 12)
Me eo sklêrijenn ar bed, eme an Aotrou ;
an hini am heuilh en devo sklêrijenn ar vuhez.
Allelouia !
En amzer-se e lavaras Jezuz d'e ziskibien :
« C’hwi eo holen an douar.
Hogen ma teu an holen da zivlazañ, gant petra e vo e sallet ?
Ne dalv mann ebet ken,
nemet da vezañ taolet er-maez ha flastret gant treid an dud.
C’hwi eo sklêrijenn ar bed.
N’hell ket bezañ kuzhet ur gêr savet war lein ur menez ;
ha ne vez ket enaouet ul lamp evit he lakaat dindan ar boezell,
met war ar c'hantolor, evit ma sklêrijenno holl dud an ti.
Evel-se ra lugerno ho sklêrijenn-c'hwi dirak an dud, evit ma teuint,
dre welout hoc'h oberoù mat,
da zougen gloar d’ho Tad a zo en Neñvoù. »