Lectures du dimanche - 29/11/2026
📅 D'ar Sul 29 a viz Du 2026
📜 1ère lecture
Lennadenn eus levr Izaias (Iz 63, 16b-17. 19b ; 64, 2b-7)
A, ma rogfes an Neñvoù ha ma tiskennfes !
C’hwi, Aotrou, a zo hon tad,
« hon dasprener a holl viskoazh », setu hoc’h anv.
Perak, O Aotrou, hon lezel da gantren
Pell eus hoc’h hentoù,
Lakaat hor c'halonoù da vezañ kaledet
Ha da chom hep ho toujañ ?
Distroit dre garantez 'vit ho servijerien,
Evit meuriadoù hoc’h hêrezh.
A-youl ma rogfec’h an Neñvoù evit diskenn,
Dirazoc’h e teuzfe ar menezioù.
Setu ma 'z oc’h diskennet, ha dirazoc’h ar menezioù
O deus teuzet evel koar.
Skouarn ebet n'he deus klevet biskoazh,
Lagad ebet n'en deus gwelet,
Un Doue estregedoc’h oc'h ober evel-se
Evit ar re a fiz ennañ. ;
Dont a rit a benn-hent d'ar re a vir ar reizhder
Hag o deus koun eus hoc’h hentoù :
Setu ma oac’h konnaret dre m'hor boa pec'het,
A-enep deoc’h, abaoe pell, e oamp disuj ;
Holl gwitibunan e oamp 'vel tud dic'hlan,
Hon oberoù kaer evel lienaj lous ;
Holl e oamp gweñvet evel delioù kras,
Hag hon drougoberoù hor c'hase ganto evel ur barr-avel.
Ne oa den ebet ken o pediñ hoc’h anv,
Den ne zihune, d'en em stagañ ouzhoc’h,
Rak kuzhet ho poa ho tremm diouzhomp,
Hon droukroet ho poa d'hor fallagriezhoù.
Ha koulskoude, Aotrou, C’hwi eo hon tad,
Ha ni ar pri ez oc’h-C’hwi ar stummer anezhañ,
Ni holl a zo labour ho taouarn.
🎶 Psaume
(Sa 80 (79), 2ac ha 3b. 15-16. 18-19)
D : Aotrou hon Doue, troit-ni davedoc'h ;
diskouezit ho tremm hag e vimp salvet !
Pastor Israel, taolit pled da selaou,
C'hwi hag a ren bugale Jozef evel un tropell-deñved.
C'hwi azezet war ar Gerubined.
Dihunit en ho kalloudegezh.
Doue ar galloudoù, distroit,
stouit eus lein an Neñvoù ha sellit ha deuit d'ober ur gwel d'ar winienn-se.
Hag he diwallit, hi hag a oa bet plantet gant ho torn dehou,
ar mab hoc'h eus kennerzhet evidoc'h.
Ra vo aze ho torn da skoazellañ den ho prec'h dehou,
ar mab hoc'h eus kennerzhet evidoc'h.
Ne fell ket deomp pellaat diouzhoc'h ken da virviken,
roit deomp buhez en-dro hag e kanmeulimp hoc'h anv.
📜 2ème lecture
Lennadenn eus lizher kentañ an Abostol sant Paol da Gorintiz (1Go 1, 3-9)
Gortoz a reomp Diskuliadur hon Aotrou Jezuz Krist.
Va breudeur, gras deoc'h ha peoc'h
digant hon Tad ha digant an Aotrou Jezuz Krist.
Trugarekaat a ran dibaouez Doue diwar ho penn,
evit ar c'hras doueel en deus roet deoc'h er C'hrist Jezuz.
Rak pep pinvidigezh hoc'h eus resevet ennañ,
pep kelennadurezh ha pep anaoudegezh,
en doare ma 'z eo deuet testeni ar C'hrist d’en em startaat en ho touez,
ha ma ne vank gras ebet deoc'h-C'hwi
hag a c'hortoz Emziskleriadur hon Aotrou Jezuz Krist.
Doue eo an hini ho startaio betek an dibenn,
evit ma viot didamall e Deiz hon Aotrou Jezuz Krist :
Feal eo an Doue en deus ho kalvet da genvevañ
gant e Vab Jezuz Krist hon Aotrou.
✝️ Évangile
Pennad eus an Aviel santel hervez Mark (Mk 13, 33 -37)
Beilhit : n'ouzit ket pegoulz e teuio an Aotrou.
Allelouia ! Allelouia ! (S 85 (84), 8)
Diskouezit deomp ho karantez, Aotrou,
Ha roit deomp ho silvidigezh.
Allelouia !
En amzer-se e komze Jezuz gant e ziskibien eus e zistro :
« Diwallit, beilhit, rak n’ouzit ket pegoulz e vo.
Hañval an traoù evel gant un den aet da bell vro, en deus kuitaet e di,
en ur reiñ ar renerezh anezhañ d’e servijerien, gant e labour da bep hini,
hag en deus gourc'hemennet d’ar porzhier beilhañ.
Beilhit eta, rak n’ouzit ket pe da vare e tistroio mestr an ti,
pe diouzh an abardaez, pe da hanternoz,
pe da gan ar c'hilhog, pe diouzh ar beure,
gant aon na zegouezhfe a-greiz-holl ha n’ho kavfe kousket.
Ar pezh a lavaran deoc'h eo d’an holl en lavaran : Beilhit ! »