Lennadennoù ar Sul
📅 D'ar Sul 1 a viz C'hwevrer 2026
📜 Lennadenn gentañ
Lennadenn eus levr Sofonias (Sof 2, 3 ; 3, 12-13)
Lezel a rin ez kreiz ur boblañs paour hag ezhommek.
Klaskit an Aotrou, C'hwi holl tud izel ar vro, a vir e varnedigezhioù,
Klaskit ar reizhder, klaskit an izelegezh,
Ha marteze e vezot e goudor e deiz kounnar an Aotrou.
Met lezel a rin ez kreiz ur boblañs paour hag ezhommek a glasko he goudor e anv an Aotrou :
Tud restad Israel, ne raint mui a fallagriezh, Ne lavarint mui a c'hevier,
Ne vo mui en o genoù un teod a dromplerezh,
A beuro hag a gavo bod, hep bezañ trubuilhet gant den.
🎶 Salm
Salm 146 Salm 146 (145), 7. 8-9a. 9bc-10
D : Eürus ar re baour a galon,
rak dezho eo rouantelezh an neñvoù !
Pe : Allelouia !
An Aotrou a zalc‘h d‘e c‘her da virviken,
reiñ a ra o gwir d‘ar re wasket,
an Aotrou a ro bara d‘ar re naoniek.
a dorr o chadennoù d‘ar brizonidi.
An Aotrou a zigor daoulagad an dalled,
an Aotrou a zigromm an dud daoubleget,
an Aotrou a gar an dud reizh.
An Aotrou a ziwall ar veajourien.
An Aotrou a sikour ar minor hag an intañvez
met diroudañ a ra mennadoù an dud fall.
An Aotrou a ren, roue da virviken,
da Zoue, o Sion, a rummad da rummad.
📜 Eil lennadenn
Lennadenn eus lizher kentañ an Abostol sant Paol d'ar Gorintiz (1Go 1, 26-31)
Ar pezh a zo dinerzh er bed-mañ a zo bet dibabet gant Doue.
Sellit pere zo bet galvet en ho touez, breudeur :
n’eus ket anezho kalz a dud gouiziek hervez an natur,
na kalz a dud c'halloudus, na kalz a dud a lignez uhel.
Met ar pezh a zo diskiant er bed-mañ a zo bet dibabet gant Doue
d’ober mezh d’ar re skiantek,
ar pezh a zo dinerzh er bed-mañ a zo bet dibabet gant Doue
d’ober mezh d’ar re greñv ;
hag ar pezh a zo dilignez er bed-mañ, ar pezh a zo disprizet,
a zo bet dibabet gant Doue ;
ar pezh n’eo netra, dibabet evit kas da netra ar re a zo o vezañ,
evit na c'hello den ebet en em veuliñ dirak Doue.
Rak m’emaoc'h er C'hrist Jezuz eo dre c'hras Doue,
eñ hag en deus lakaet Jezuz da vezañ evidomp furnez,
reizhded, santeladur ha daspren,
evit ma vo gwir lavar ar Skritur :
« Mar fell d’un den bennak en em veuliñ, ra 'n em veulo en Aotrou. »
✝️ Aviel
Pennad eus an Aviel santel hervez sant Mazhev (Mz 5, 1-12a)
Eürus ar re baour a galon.
Allelouia ! Allelouia ! (Mzh 5, 12a)
Bezit laouen ha tridit gant levenez,
rak bras e vo ho tigoll en Neñvoù.
Allelouia !
En amzer-se, o welout an engroezioù-tud-se e savas Jezuz war ur menez,
hag aet en e goazez, e tostaas outañ e ziskibien.
Neuze e stagas da gomz ha d’o c'helenn dre lavarout :
« Eürus ar re a gar ar baourentez, rak dezho eo Rouantelezh an Neñvoù.
Eürus ar re a ouel, rak int a vo frealzet.
Eürus ar re 'zo kuñv, rak int o devo an Douar da lod.
Eürus ar re o deus naon ha sec'hed eus ar Reizhded, rak int a vo roet o gwalc'h dezho.
Eürus ar re a zo trugarezus, rak int ivez a vo graet trugarez outo.
Eürus ar re a zo glan a galon, rak int a welo Doue.
Eürus ar re a laka ar peoc'h da ren, rak int a vo anvet bugale Doue.
Eürus ar re a zo gwallgaset en abeg d’ar Reizhder, rak dezho eo Rouantelezh an Neñvoù.
Bezit eürus pa vezot dismegañset, heskinet, pa vezo lavaret dre c'haou,
a bep seurt droug diwar ho penn, abalamour din-me.
Bezit laouen ha tridit gant levenez,
rak bras e vo ho tigoll en Neñvoù ! »
🎙️ Selaou Aviel an deiz
📅 D'ar Sul 1 a viz C'hwevrer 2026Hébergé par Audiomeans. Visitez audiomeans.fr/politique-de-confidentialite pour plus d\'informations.